ప్రపంచంలో అయ్య, బాపు, నాన్న, తండ్రి, డాడీ, ఫా, ఫాదర్, అబ్బాజాన్‌, పప్పా ఇలా పిలడవానికి ఎన్ని పేర్లున్నా ఒక్కో తండ్రికి ఆకాశమంత చరిత్ర ఉంది. కని పెంచి కడుపు చూసేది అమ్మైతే.. నడిపించి భవిష్యత్తుని చూసేవాడే నాన్న..అమ్మ కనిపించే వాస్తవమైతే.. నాన్న ఓ నమ్మకం.. లాలించేది అమ్మ ఒడి.. నాన్న భుజం లోకాన్ని చూపే బడి. అమ్మ జోల పాట ఎలాగో.. నాన్న నీతి పాఠం కూడా అలాగే ఉంటుంది. తమ కన్నా మిన్నగా బిడ్డ తయారు కావాలని కలలు కనేది కన్నవారే. నాన్న మనకోసం తన జీవితాన్ని త్యాగంచేసే త్యాగమూర్తి. మనం ఓడినప్పుడు నేనున్నా అంటూ ఓదార్చే ఎమోషన్ నాన్న.. మనం గెలిచినప్పుడు పదిమందితో చెప్పుకునేవాడే నాన్న… మన నుంచి కృతజ్ఞతలు ఆశించని అమాయక చక్రవర్తి నాన్న.. ప్రపంచంలో అమ్మకు ఎంత గొప్ప స్థానం ఉందో.. నాన్నకు కూడా అంతే గొప్ప స్థానం ఉంది. అటువంటి నాన్నకు ప్రతీఒక్కరు రుణపడి ఉండాలి. టెక్నాలజీ పెరిగిన ఈ రోజుల్లో సోషల్ మీడియాలో పొస్టులు పెట్టి చేతులు దులుపుకోవడం, వాట్సాప్ లో స్టేటస్ పెట్టి ప్రపంచాన్ని జయించినట్టు ఫీలయ్యే సమాజంలో మనం బ్రతుకుతున్నాం. అయితే నాన్నకు సోషల్ మీడియాలో పోస్టులు పెట్టి శుభాకాంక్షలు చెప్పడం కాకుండా మన పక్కనే ఉండే నాన్నతో కాసేపు మాట్లాడితే నాన్న ఎంతో సంతోషంగా ఫీలవుతారు. లాభం ఆశించకుండా నిస్వార్థంగా తన పిల్లల కోసం తన జీవితాన్ని ధారపోస్తాడు నాన్న..
నాన్న_మనకోసం
ఏం_చేశాడో
ఏం_కోల్పోయాడో
మనకు_తెలియదు..!
జీవితాంతం పిల్లల కోసం తపిస్తూ, వారి అభివృద్ధి కోసం పాటుపడే వ్యక్తి తండ్రి.
తండ్రి తన పిల్లల కోసం జీవితంలో ఎన్నో కోల్పోతాడు.
నాన్న మన కోసం ఏం చేశాడో మనకు తెలియదు. ఎన్ని కష్టాలు పడ్డాడో తెలియదు.
ఎందుకంటే.. నాన్న ఎవరికీ చెప్పడు. పిల్లలకి, భార్యకి అసలు చెప్పడు.
అమ్మలా ప్రేమను బయటికి చూపించడం నాన్నకు రాదు.
నాన్న ఇంటికి ఎప్పుడో వస్తాడు, వెళ్లిపోతాడు.
‘ఎప్పుడూ పనేనా? కాస్త ఇంటి దగ్గర ఉండొచ్చుగా..’ అని చిరాకు పడుతున్న అమ్మ మాటలు వింటుంటాం.
పిల్లలు కూడా నాన్నను మిస్‌ అవుతుంటారు.
నిజానికి నాన్నను నాన్నే మిస్‌ అవుతుంటాడు.
పెళ్లై, పిల్లలు పుట్టగానే నాన్న జీవితం నాన్న చేతుల్లో ఉండదు.
మనందరి కోసం నాన్న రాత్రి, పగలు పనిచేయాలి.
చదువులు, సమస్యలు, బంధువులు, పండగలు, బర్త్‌డేలు, ఆసుపత్రులు.. వీటన్నింటితో నాన్న నలిగిపోతుంటాడు.
ఆయనకు ఆరోగ్య సమస్యలు వస్తుంటాయి.
వృద్ధాప్యం వల్ల అని పిల్లలు అనుకుంటారు. కానీ నాన్నకు వృద్ధాప్యం ఇంకా రాలేదు..
మీ కోసం అనుక్షణం కరిగిపోతూ, కాలిపోతున్న నాన్నకి లోపల ఆరోగ్యం ఎంత దెబ్బ తింటోందో తెలియదు.
నాన్న డాక్టర్‌ను కలిసిన విషయం కూడా మనకు తెలియదు. ఎందుకంటే.. ఆ రిపోర్ట్‌లు తీసుకుని ఇంటికి రాడు.
తన పిల్లలు గొప్ప వాళ్లు అవుతారని నాన్నకు విపరీతమైన నమ్మకం. అందుకే తను ఎంతో కష్టపడుతూ.. అప్పులు చేసి మంచి స్కూల్, మంచి కాలేజీలలో చదివిస్తాడు.
ఆఫీసుకు సెలవు పెట్టి, స్కూల్‌లో పిల్లల సీటు కోసం లైన్‌లో నిల్చుంటాడు.
మీరు పరీక్ష రాస్తుంటే బయట రోడ్డు పక్కన ఎండలో నిల్చుని ఉంటాడు.
పిల్లలు ఏదో సాధించేస్తారని ఆశ.
పిల్లలు ఏదైనా తప్పులు కానీ..తన పిల్లలకు ఎవరైనా హాని కలిగిస్తున్నారని కానీ తెలిస్తే…తన పనులన్నీ మానుకొని మీ తప్పులను సరిదిద్దుతూ, పిల్లలకు హాని తలపెట్టే ఎదుటి వారు ఎవరనేది కూడా చూడకుండా..ఎంతటి వారినైనా కూడా తన ప్రాణాన్ని లెక్కచేయకుండా ఎదుర్కొంటాడు…
పిల్లల భవిష్యత్తు కొరకు తన కున్న
ఆస్తులు అమ్మేసి కూతురు, కొడుకు పెళ్లి ఘనంగా జరిపిస్తాడు.
ఇంకా అప్పులైతే ఎక్కడ, ఎన్ని సంతకాలు పెడతాడో మనకు తెలియదు.
కొన్ని వందలసార్లు అమ్మ ఏడ్వడం చూశాం కానీ, నాన్న ఏడ్వడం ఎప్పుడైనా చూశారా?.. నాన్న కూడా ఏడుస్తాడు. కానీ మీ ముందు ఏడ్వడం ఆయనకు ఇష్టం ఉండదు. ఎక్కడో ఒంటరిగా కూర్చుని ఏడుస్తాడు.
పిల్లలు పెద్దయి, ఏదో పని చేసుకునే సమయానికి..
నాన్న అన్నీ అమ్ముకుని, అంతా ఆరిపోయి, అంత్యంత ఆనారోగ్యంతో మిగిలిపోతాడు.
అప్పుడే పిల్లలు నాన్నకు ఎదురుచెప్పడం మొదలుపెడతారు.
‘ఇన్నాళ్లూ వీళ్ల కోసం ఇంత చేశానా?, నేను ఎవరి కోసం బతికాను?’ అనే ఆలోచనలు నాన్నకు వస్తాయి.
‘నా కోసం నేను ఏదీ దాచుకోలేదే..’ అనుకుంటాడు.
నిజానికి ‘నేను’ అనే ఆలోచన అప్పటి వరకు నాన్నకు తెలియదు.
ఉన్న రెండు ఎకరాలు నాన్న పోగొట్టాడు అనుకుంటాం. ఎందుకంటే అమ్మ అలాగే చెబుతుంది కాబట్టి.
ప్రతి కొడుకు ఏదో ఒక సమయంలో నాన్నను ఏడిపిస్తాడు. నాన్న గుండెలపై తంతాడు. అప్పటికి ఏడ్వడానికి నాన్నకు కన్నీళ్లు కూడా మిగలవు. అవి ఎప్పుడో ఆవిరైపోయుంటాయి.
కొడుకు ఎంత మంచివాడు, ప్రయోజకుడైతే తండ్రిని అంత బాధ పెడతాడు. వాడికి ఎంత సక్సెస్‌ వస్తే.. అంత ఎక్కువగా తండ్రిని ఏడిపిస్తాడు. ఇది నిజం.
మీకు కొడుకు పుడితే వాడి స్నేహితుల పేర్లు గుర్తుంటాయి. బర్త్‌డే వస్తే, పిల్లల్ని ఆహ్వానిస్తాం. కానీ, మీ నాన్న స్నేహితులు ఎవరో మీకు తెలియదు. అసలు మీ నాన్న పుట్టినరోజు కూడా మీకు గుర్తుండదు. ఎందుకంటే నాన్న ఎప్పుడూ పెద్దగా పుట్టిన రోజులు జరుపుకోడు కానీ.. మీ పిల్లలే మీ భవిష్యత్తని ఫీల్‌ అవుతారు. నాన్న మీ భవిష్యత్తు కాదు. కానీ నాన్నకు మీరే భవిష్యత్తు.
మీ కోసం రిస్క్‌ తీసుకోలేక, ధైర్యం సరిపోక మీ నాన్న తన కెరీర్‌ను నాశనం చేసుకున్నాడు.
మీ మూలంగానే మీ నాన్నలో ఉన్న ఎనర్జీ పోయింది.
ఎక్స్‌ట్రార్డినరీ అవ్వాల్సిన ఎంతో మంది నాన్నలు జీవితంలో తమ పిల్లల కోసం ఆర్డినరీగా మిగిలిపోయారు..’
🌹ప్రతీ నాన్నకు సెల్యూట్ 🌹
🌾👨👧👦🌾
