Cinemarangam.Com
సినిమా : “చే” – లాంగ్ లైవ్
విడుదల తేదీ : 15.12.2023
రివ్యూ రేటింగ్ : 3.25 /5
బ్యానర్: నేచర్ ఆర్ట్స్
నిర్మాతలు: సూర్య , బాబు, దేవేంద్ర
కో డైరెక్టర్: నాని బాబు
రచయిత, దర్శకుడు: బి.ఆర్ సభావత్ నాయక్
నటీనటులు: లావణ్య సమీరా, పూల సిద్దేశ్వర్, కార్తీక్ నూనె, వినోద్, పసల ఉమామహేశ్వర్, బి.ఆర్ సభావత్ నాయక్..
సినిమాటోగ్రాఫ‌ర్స్ : కళ్యాణ్ సమి, జగదీష్
ఎడిటర్: శివ శర్వాణి
సంగీత దర్శకుడు : రవిశంకర్
పబ్లిసిటి డిజైనర్: వివ రెడ్డి పోస్టర్స్
పీఆర్ఓ: దయ్యాల అశోక్
క్యూబా పోరాటయోధుడు చేగువేరా జీవిత చరిత్ర ఆధారంగా తెలుగులో రూపొందిన చిత్రం “చే”.లాంగ్ లైవ్ అనేది ట్యాగ్ లైన్. విప్లవ వీరుడిగా, పోరాట యోధుడిగా చరిత్ర పుటల్లో సుస్థిర స్థానాన్ని సంపాదించుకున్నాడు. తనలోని ధైర్యసాహసాలు, యుద్ధ నైపుణ్యం, అసాధారణ తెలివితేటలు.. ఇలా చెప్పుకుంటే పోతే ఆయన గురించి ఎంతో చెప్పుకోవచ్చు. నవ ఉదయం సమర్పణలో నేచర్ ఆర్ట్స్ బ్యానర్‌పై బీఆర్ సభావత్ నాయక్ టైటిల్ రోల్ పోషిస్తూ, దర్శకత్వం వహిస్తున్నారు. “చే” చిత్ర ఫ‌స్ట్ లుక్, టీజ‌ర్‌కు ప్రేక్షకుల నుండి అద్భుతమైన రెస్పాన్స్ వచ్చింది. “చే” ట్రైల‌ర్‌ను చూస్తే రోమాలు నిక్క‌బొడుచుకునేలా ఉందంటూ సోషల్ మీడియాలో వైరల్ గా మారింది.అన్ని కార్యక్రమాలు పూర్తి చేసుకోని డిసెంబర్ 15న గ్రాండ్ గా ప్రేక్షకుల ముందుకు వచ్చిన “చే’ సినిమా ఎలా ఉందో రివ్యూ లో చూద్దాం పదండి.
క్లుప్తంగా
వైద్యవిద్యార్థిగా ఉన్న సమయంలో చెగువేరా తన మిత్రుడు అల్బర్ట్‌ గ్రనాడోతో కలిసి మోటారు సైకిల్‌పై దక్షిణ అమెరికా ఖండంలోని దేశాలన్నిటినీ చుట్టాడు. ఆయా దేశాలలో తాండవిస్తున్న పేదరికం చెగువేరాను తీవ్రంగా కలచి వేసింది. భూస్వాముల, ధనిక రైతుల దోపిడీలు చెగువేరాకు ఆగ్రహం తెప్పించాయి. అమానుషమైన పెట్టుబడిదారీ వ్యవస్థ నాశనమయ్యేవరకూ పేదల బతుకులు మారవని గ్రహించాడు. అనుకున్నదే తడవు క్యూబన్‌ విప్లవ పోరాటంలో భాగస్వామ్యం వహించాడు. ఫిడల్‌ క్యాస్ట్రోతో కలిసి క్యూబా విప్లవం విజయానికి వ్యూహరచన చేశాడు. క్యూబా ప్రతినిధిగా పలు దేశాలలో తిరుగుతాడు. గెరిల్లా యుద్ధతంత్రంలో చేగువేరా ఆరితేరాడు. యుద్ధభూమిలో తాను ముందు నిలబడి గెరిల్లా దళాల్ని నడిపిస్తాడు. క్యూబా పునర్నిర్మాణంతో సంతృప్తి చెందని చేగువేరా అనంతరం కాంగో, బొలీవియాల విముక్తి కోసం ఉద్యమిస్తాడు. కానీ కాంగోలో ఇతని దళంలోని విప్లవ వీరుల ప్రయత్నాలు విజయవంతం కాదు. ఎంతో మంది చ‌నిపోతారు. ఈ కారణంగా మధ్యలోనే చేగువేరా వెనుదిరగాల్సివచ్చింది. ఆ తరువాత బొలీవియా విముక్తి పోరాటంలో పాల్గొంటాడు. చివ‌రికి బొలీవియా సైనిక దళాలకు చేగువేరా బందీగా చిక్కుతాడు. అయినప్పటికీ శత్రువుల కళ్ళలోకి చూస్తూ మాట్లాడుతాడు. తనను శత్రువులు చంపగలరేమోగానీ.. తన ఆశయాల్ని చంపలేరని నినదిస్తాడు. చేగువేరా క‌థ‌ను పూర్తిస్థాయిలో న‌డిపించిన విధానం చూడాలంటే థియేట‌ర్‌కు వెళ్లాల్సిందే.
కథ:
విప్లవం బాట ప‌ట్టిన ‘చే’ (సభావత్ నాయక్) పలు దేశాలు తిరుగుతూ పీడిత జ‌నాన్ని చైత‌న్య ప‌రుస్తుంటాడు. ఒక సమయంలో పోలీసుల ఎదురుకాల్పుల్లో గాయ‌ప‌డ‌తాడు. గాయ‌ప‌డిన ‘చే’ను ఒక గిరిజ‌న గ్రామ‌స్తులు కాపాడుతారు. ఆ క్ర‌మంలో సింగి (లావణ్య) ‘చే’ను ప్రేమిస్తుంది. శ‌రీర‌కంగానూ ద‌గ్గ‌ర‌వుతుంది. ఆకలి, నిరక్షరాస్యత, అనారోగ్యం త‌దిత‌ర సమస్యలపై దృష్టిపెడ‌తాడు. కేవలం కడుపు నింపుకోవటం కోసమే పని చేసే పరిస్థితి నుండి ప్రపంచాన్ని మరింత మెరుగుపరచాలని ప్ర‌య‌త్నిస్తాడు. ఈ క్ర‌మంలో పోలీసుల చేతిలో తన ద‌ళ స‌భ్యులు చ‌నిపోతారు. చివ‌రికి ‘చే’ కూడా బొలీవియా సైనిక దళాలకు బందీగా చిక్కుతాడు. ఆ త‌ర్వాత ఏమైందీ? తను ప్రేమించిన అమ్మాయి ఎలా ఉంది? అనేదే ఈ కథ..
న‌టీన‌టుల :పనితీరు
చేగువేరా పాత్ర‌లో బిఆర్ సభావత్ నాయక్ న‌టించాడు. “న‌టించాడు” అనేదానికంటే “జీవించాడు” అంటే బాగుంటుందేమో. అంతేకాదు.. అచ్చం చేగువేరా ఇత‌డేనేమో అనుకునేలా అత‌ని లుక్ ఉంది. ఈ త‌రం ప్రేక్ష‌కుల‌కు చేగువేరా ఎలా ఉంటాడో పూర్తిస్థాయిలో చూపించాడు. లీడ్ రోల్‌లో సభావత్ నాయక్ చెప్పిన డైలాగ్‌లు ఈ సినిమా హైలైట్ పాయింట్స్‌గా చెప్పుకోవచ్చు. చే కు జంట‌గా న‌టించిన లావణ్య తన పాత్ర‌లో చ‌క్క‌గా న‌టించింది. ఒక అంద‌మైన అమాయ‌క‌పు గిరిజ‌న అమ్మాయిగా న‌టించి తన పాత్ర‌కు ప‌రిపూర్ణ‌త తెచ్చింది. ఇక ఇత‌ర పాత్ర‌ల్లో న‌టించిన పూల సిద్దేశ్వర్, కార్తీక్ నూనె, వినోద్, పసల ఉమామహేశ్వర్ త‌మ త‌మ పాత్ర‌ల‌కు న్యాయం చేశార‌నే చెప్పొచ్చు.
సాంకేతిక నిపుణుల పనితీరు
ఇండియాలోనే తొలిసారి తెలుగులో తెర‌కెక్కిన సినిమా అన‌గానే ఇండ‌స్ట్రీలో ఒక్క‌సారి హాట్ టాపిక్ అయింది “చే” మూవీ. ఈ సినిమాను తెరకెక్కించిన బి.ఆర్ సభావత్ నాయక్.. ఇటీవ‌ల తన గురించి ప‌రిచ‌యం చేసుకున్న విష‌యం కూడా వైరల్ అయింది. చేగువేరా బ‌యోపిక్‌ను సినిమాగా తీయాల‌ని 20 ఏళ్లుగా త‌పించాన‌ని, తోపుడు బండిపై మ‌ర‌మ‌రాలు అమ్ముతూ పైసాపైసా కూడబెట్టి సినిమా తీశాన‌ని చెప్పారు. ఒక అతిసాధార‌ణ వ్య‌క్తి.. అసాధారణ వ్య‌క్తి చరిత్ర ఎలా తెర‌కెక్కిస్తాడో చూడాల‌న్న ఆస‌క్తి చాలామందిలో పెరిగిపోయింది. చేగువేరా జీవిత చ‌రిత్ర‌ను చిన్న‌ప్పుడే చ‌దివి, అనేక పుస్త‌కాల నుంచి ఎంతో స‌మాచారం తీసుకున్న‌ట్టు సభావత్ నాయక్ ఇప్ప‌టికే చెప్పారు. అందుకే సాధార‌ణ క‌థ‌తో పాటు, చేగువేరా లైఫ్ గురించి బ‌య‌ట ప్ర‌పంచానికి తెలియ‌ని విష‌యాల‌ను కూడా ఎంతో ఆస‌క్తిగా తెర‌కెక్కించాడు దర్శకుడు బి.ఆర్ సభావత్ నాయక్. సినిమాలోని పాత్ర‌లు ఇండియాలో మాదిరిగానే క‌నిపిస్తాయి. ఇంకా చెప్పాలంటే గిరిజ‌నుల‌ను పోలి ఉంటాయి. చేగువేరా బ‌యోపిక్‌ను మ‌న నెటివికి దగ్గ‌రగా చూపించాల‌న్న ఉద్దేశంతోనే సినిమా తీసిన‌ట్టు మ‌న‌కు అర్థ‌మ‌వుతుంది.
చేగువేరా క్యూబా, లాటిన్ అమెరికాకు మాత్రమే పరిమితం కాదు. ప్రపంచంలో ఎన్నో దేశాలలో పోరాటాల‌కు స్ఫూర్తి అనే విష‌యాన్ని ఈ సినిమా ద్వారా సూటిగా చెప్పాడు .కథ క్ర‌మం కూడా దారి త‌ప్ప‌కుండా తాను రాసుకున్న‌ది తెర‌పై చూపించ‌డంలో స‌క్సెస్ అయ్యాడ‌నే చెప్పొచ్చు. చేగువేరా చెప్పే మాటలు కూడా తూటాల్లా ఉంటాయ‌ని నిరూపించ‌డానికి డైలాగ్‌లు ప‌వ‌ర్‌ఫుల్‌గా రాసుకున్నాడు అప్పుడ‌ప్పుడు ప‌వ‌న్ కళ్యాణ్ కూడా చేగువేరాను గుర్తు చేస్తాడు. అదే స్ఫూర్తితో తీశాన‌ని డైరెక్టర్ బి.ఆర్ సభావత్ నాయక్ తెలిపాడు.
ఈ సినిమాలో బ్యాక్‌గ్రౌండ్ మ్యూజిక్ మెయిన్ హైలైట్ పాయింట్‌గా నిలిచింది. రవిశంకర్ అందించిన మ్యూజిక్ సినిమాను నెక్ట్స్ లెవ‌ల్‌కు తీసుకెళ్లింది. మ్యూజిక్‌తో పాటు సినిమాటోగ్రాఫ‌ర్స్ కళ్యాణ్ సమి, జగదీష్ ల విజువ‌ల్స్ కు కొన్ని సీన్ల‌లో రోమాలు నిక్క‌బొడుచు కుంటాయి. ఎడిటర్ శివ శర్వాణి పనితీరు బాగుంది..
నవ ఉదయం సమర్పణలో నేచర్ ఆర్ట్స్ బ్యానర్‌పై సూర్య , బాబు, దేవేంద్ర లు నిర్మించిన నిర్మాణ విలువలు బాగున్నాయి. ఈ త‌రం యువ‌త‌కు, చేగువేరా గురించి తెలియ‌ని వారికి మంచి ఆప్ష‌న్ ఈ సినిమా. ప్రపంచంలో ఒక ముఖ్యమైన, అరుదైన చరిత్ర తెర‌పై చూసే అవ‌కాశం ఈ సినిమా క‌ల్పిస్తుంది. రోమాలు నిక్క‌బొడుచుకునే సీన్ల‌తో పాటు భావోద్వేగాలు ఆస్వాదించాలంటే “చే” సినిమా కచ్చితంగా చూడాల్సిందే. సినిమా చూసిన వారందరికీ ఈ సినిమా బాగా కనెక్ట్ అవ్వడమే కాకుండా సినిమాకు వచ్చిన ప్రతి ఒక్కరూ మంచి అనుభూతితో థియేటర్ నుండి బయటకి వస్తారు
Cinemarangam.Com Review Rating 3.25/5
