ఎస్.ఎన్.ఎస్ క్రియేషన్స్ పతాకంపై జవ్వాజి రామాంజనేయులు సమర్పణలో యంగ్ హీరో సందీప్ కిషన్, హన్సిక జంటగా జి.నాగేశ్వర రెడ్డి దర్శకత్వంలో అగ్రహారం నాగిరెడ్డి, సంజీవ్ రెడ్డి, రూపా జగదీష్ లు నిర్మిస్తున్న చిత్రం ‘తెనాలి రామకృష్ణ బీఏబీఎల్’. ‘కేసులు ఇవ్వండి ప్లీజ్’ అన్నది ఉపశీర్షిక.
దేశముదురు’ చిత్రంతో హీరోయిన్ గా ఎంట్రీ ఇచ్చి అందం, అభినయంతో మొదటి సినిమాతోనే ఆడియన్స్ లో మంచి క్రేజ్ సంపాదించుకుంది హన్సిక మోత్వాని. ఆ తర్వాత తెలుగులో స్టార్ హీరోలతో నటించే అవకాశం సాధించింది.. ఈ నెల 15న ‘తెనాలి రామకృష్ణ బీఏబీఎల్’. గ్రాండ్ గా విడుదల కానున్న సందర్భంగా హీరోయిన్ హన్సిక మోత్వాని ఇంటర్వ్యూ..
ఈ మూవీ ఒప్పుకోవడానికి గల కారణాలేమిటి?
– గతంలో నాగేశ్వర రెడ్డి దర్శకత్వంలో ‘దేనికైనా రెడీ’ చిత్రాన్ని చేయడం జరిగింది. ఆ సినిమా నటిగా నాకు మంచి పేరు తీసుకువచ్చింది. ఆప్పటినుండీ నాగేశ్వర రెడ్డి గారితో మంచి పరిచయం ఉంది. అయితే ఈ మూవీలో నా క్యారెక్టర్ గురించి చెప్పినప్పుడు చాలా ఎగ్జయిటింగ్ గా అనిపించింది. పెర్ఫామెన్స్ కి మంచి స్కోప్ ఉన్న క్యారెక్టర్ కావడంతో వెంటనే ఒప్పుకున్నాను.
హీరో సందీప్ కిషన్ తో వర్క్ ఎక్స్పీరియన్స్?
– సందీప్ కిషన్ గారు టాలెంటెడ్ యాక్టర్, నైస్ కో స్టార్. ఈ సినిమాలో మా ఇద్దరివి లాయర్ క్యారెక్టర్స్. పూర్తి స్థాయి వినోదాత్మకంగా ఉంటాయి. ఇద్దరికీ వినోదం అంటే చాలా ఇష్టం కాబట్టి బాగా ఎంజాయ్ చేస్తూ ఈ సినిమా చేశాం.
వరలక్ష్మీ మరో పాత్ర చేస్తున్నారని తెలిసినప్పుడు ఎలా ఫీల్ అయ్యారు?
– వరలక్ష్మీ గారు చాలా మంచి నటి, అలాగే ఆమె క్యారెక్టర్ ఈ సినిమాలో కీలకం ఐనప్పటికీ నా పాత్ర ప్రాధాన్యం వేరు. మా దర్శకుడు నాగేశ్వర రెడ్డి గారు ప్రతి పాత్రకు ప్రాముఖ్యం ఉండేలా స్క్రిప్ట్ సిద్ధం చేసుకున్నారు. దానివల్ల ఒకరినిఒకరు డామినేట్ చేశాం అనే ఆలోచనే రాదు.
ఈ మధ్య కాలంలో తెలుగులో తక్కువ చిత్రాలు చేస్తున్నారు?
– దురదృష్టవశాత్తు ఎందుకో ఒక తెలుగు సినిమా తర్వాత మరొకటి చేయడానికి దాదాపు రెండేళ్ల సమయం పడుతుంది. నేను తమిళ సినిమాలలో బిజీ అవడం కూడా ఒక కారణం. కానీ తెలుగులో సినిమా చేసే అవకాశం ఎప్పుడు వచ్చినా అస్సలు వదులుకోనూ తప్పకుండా చేస్తాను. నాకు భాషా భేధాలు అంటూ ఏమీ లేవు. మంచి చిత్రం అనుకుంటే ఏభాషలోనైనా చేయడానికి సిద్దమే.
ఇప్పటి వరకూ మీ కెరీర్ చూస్తుంటే ఏమనిపిస్తుంది?
– ఇప్పటికే అన్ని భాషలలో 50కి పైగా చిత్రాలు చేశాను. అన్ని భాషలలో స్టార్ హీరోలతో నటించే అవకాశం దక్కింది.
నాకు మంచి పాత్రలు ఇచ్చిన దర్శక నిర్మాతలకు థాంక్స్. అలాగే ఇప్పటివరకూ నన్ను సపోర్ట్ చేస్తున్న అభిమానులకు నేను ఎప్పటికీ రుణపడి ఉంటాను. నా కెరీర్ లో ఇప్పటివరకూ నేను చేసిన సినిమాలు, క్యారెక్టర్స్ పట్ల నేను చాలా హ్యాపీ గా ఉన్నాను.
భవిష్యత్తులో నెగెటివ్ రోల్స్ చేసే అవకాశం ఉందా?
– కచ్చితంగా ఉంది. పూర్తి స్థాయి నెగెటివ్ రోల్ కాకున్నా కొన్ని చిత్రాలలో ఆల్రెడీ ఆ తరహా పాత్రలను చేశాను. నాకు తెలిసి కామెడీ, విలన్ పాత్రలు చేయడం చాలా కష్టం. అలాంటి పాత్రలు చేసే అవకాశం వస్తే నటించడానికి నేను ఎప్పుడూ రెడీనే.
మీ నెక్స్ట్ ప్రాజెక్ట్స్?
– ప్రస్తుతం తమిళంలో నాలుగు చిత్రాలు చేస్తున్నాను. అలాగే దర్శకుడు అశోక్ తెరకెక్కించనున్న ఒక వెబ్ సిరీస్ లో నటిస్తున్నాను. ఆ వెబ్ సిరీస్ లో నా క్యారెక్టర్ చాలా ఎగ్జయిటింగ్ గా ఉంటుంది. ఇంకా రెండు మూడు ప్రాజెక్టులు చర్చల దశలో ఉన్నాయి వాటి వివరాలు త్వరలోనే తెలియజేస్తాను. అంటూ ఇంటర్వ్యూ ముగించారు హీరోయిన్ హన్సిక మోత్వాని.